أنواع الخطابات

كبرت البنت وبلشوا الخطابات ايزورها وهون بتكبر المشكلة لما بيطلعوا الخطابات من هالانواع يلي لح اسردها
الخطابة المأنزعة :
وهذه الخطابة ....تدخل وهي (شامرة أنفها ) ومو عاجبها شي على الرغم من انو ابنها ممكن يكون و لاشي ....وتبدأ بالتأمل بأثاث المنزل والثريات والسجاد ...وفناجين القهوة ..... وعندما تدخل الفتاة تنظر إليها (من فوق لتحت ) .....ولا تخرج منها كلمة (يسلمو إيديك ) إلا بألف يا ويلاه .....وعندما تجلس الفتاة امامها ....لا تعبّرها أبداً ....وإنما تنظر لها بين الفينة والأخرى من طرف عينها ...وتوجه الحديث كاملاً للأم (هذا إذا تنازلت وتكلمت )..... وقد ترافق هذا النوع من الخطابات ابنتها أو قريبتها اللطيفة التي تحاول تلطيف الجو قليلاً ....بسؤال البنت بعض الأسئلة التقليدية ....

الخطابة الملطوشة :
وهذا النوع من الخطابات تكون ملطوشة كتير ....عادة ما تأتي متأخرة ...ومعجوقة ...(لأن أحد ما ينتظرها في السيارة ) ...ترفض شرب القهوة أو العصير ..... بحجة أنها مستعجلة ..... لا تركز أبداً لا في الفتاة ولا في أهلها ...وهي تنظر في الساعة ......وربما تطلب من الأم ان يأتي ابنها الذي ينتظرها تحت ليرى الفتاة بالمرة (بما انها جاءت وجاءت ) ....

الخطابة الحنونة :
هذا النوع من الخطابات تكون لطيفة كثيراً ....تنتظر للفتاة بعين الحب والعطف والرعاية ..... تأخذ فنجان القهوة وهي تقول للفتاة " تسلميلي على الوش ...." .... وتكثر من عبارات " تقبريني .... تسلميلي ....حبيبتي ....عيني ....." ...وغالباً انها (بتروح وما بترجع .....)

الخطابة قليلة الذوق :
هذه الخطابة هي من تظن نفسها أنها تأتي لمعاينة بضاعة ....وتتصرف كأن الفتاة التي أمامها حجر ...وليست فتاة من لحم ودم ..... لا تتكلم إلا قليلاً ...فهي قد أتت لمهمة محدد .... إذا دخلت الفتاة ولم تعجبها ....تبادر الأم بالسؤال (أمام الفتاة ) ..." في عندك بنت تانية ...معلش تفوتيها ...." وقد تسأل البنت نفسها " حبيبتي ...ما عندك رفقات ..." وكأنها تقول ....هذه البضاعة لم تعجبني ... بدي مواصفات غير هيك ......

الخطابة اللتاتة :
هذه الخطابة تأتي وتجلس ...وتطول بها الجلسة وكأنها في استقبال ...تتكلم عن نفسها وعن بناتها وعن جاراتها وأقاربها سير وقصص لا دعوى لك فيها ..... فلانة تجوزت وفلانة تطلقت ...وفلانة معترة ....وهكذا ....تدخل الفتاة وتخرج ...ولا تهتم بها إلا قليلاً .... لأنها مهتمة بمتابعة قصصها ....
وعلى الأم مسايرتها ومجاراتها بأحاديثها عن ناس لا تعرفهم أصلاً .... وأحياناً كثيرة ...(من كتر اللت ولعجن ) تصل أم الفتاة والخطابة إلى قرابة ما ... أو معرفة قديمة .....لتنتهي الجلسة بأحد الأقول " شايفة الدنية شو صغيرة " ...." جبل لجبل ما بيلتقو بس بني آدم لبني آدم بيتلقو ....."

الخطابة الصامتة :
وهذه الخطابة ...تكون (على عكس اللتاتة ) لا تحب الكلام ....لذلك تراها تجلس صامتة ...تركز نظرها على أحد أركان السجادة ....حتى أنك لا تكاد تسمع إلا قرع فنجانين القهوة بين الفينة والأخرى .....مما قد يثير موجة من الضحك في نفس الفتاة .... وقد تبادر والدتها بالحديث عن الطقس (الحديث المعتاد ) لكسر الصمت المخيم ....

الخطابة المرعوبة :
عادة ما تكون هذه الخطابة جالسة بأمان الله .... إلى أن تدخل الفتاة حاملة فناجين القهوة ....عندها (تبحت بأرضها ) وكأنها رأت عزرائيل ... أو كأن أفعى أوعقرباً لسعها ..... حتى أنك قد تبادرين بسؤالها إن كانت تحتاج لطاسة رعبة .... ثم تغادر مسرعة .... هرباً من هول ما رأت ...

الخطابة المثقفة :
هذا النوع جيد معظم الاحيان ....فهي (وخصوصاص إن كانت موظفة ) تكون عملية جداً ....غالباً تحضر ابنها معها .... لأنه هو من ستزوج ... يصبح هذا النوع مزعجاً ...عندما تبدأ بإملاء الملاحظات على ابنها " اسألها شو عم تدرس ....." ..." حاكيها حبيبي ..." عندها ينقلب لون الشاب للأحمر ...ويتلعثم في كلامه ....

الخطابة المحقق :

تبدأ بالأسئلة والتحريات من اللحظة التي تجلس فيها على الكرسي ....تحس والدة الفتاة والفتاة أنهم في قسم تحريات ...من الأسئلة التي ترمى رشاً ودراكاً ..." شو بيشتغل زوجك ؟؟؟" " شو بتشتغلي .....؟"" قديش راتبو لزوجك ؟؟؟؟مزوجة ولادك؟؟؟ بيت مين اخدتيلن او اخدهن؟؟؟ وين ساكنين؟؟؟انت بيت مين؟؟؟" " البيت ملك ؟؟؟؟ عندكون سيارة ؟؟؟؟ " وللبنت ..." لوين بتروحي ....؟؟؟ " وشو بتعملي ..؟؟؟ و بتصير اذا الواحد ؟"
و بتصير بدها تفوت الحمام فجأة ...ليتسنى لها الدخول لعمق البيت ...والتأكد من نظافته ورتابته

نوع آخر من الخطابات وهي التي تدعي أنها مودرن ومثقفة
وأنها حماية ما حصلت وتبدأ بالسخرية من الخطابات الدقة القديمة (من وجهة نظرها طبعاً) بالقول للعروس شفتي كيف بيشدو شعر العروس بالمسلسلات مشان يتأكدو ان إذا شعرها الحقيقي ولا عيرة .. وطبعاً بتكون وهي عم تحكي عم تمثل الموقف عملياً
وبنفس الوقت تعتقد بأنها بهذه المزحة البايخة والتي لا تخفى على العروس وأهلها
أنها بشطارتها و بين المزح والجد تأكدت من كل المواصفات من الشعر والريحة والسنان والسمع .. وما إلى ذلك .. وبدون ما حدا يشتلأ على أساس
وطبعاً في كتييييير أنواع تانية من الخطابات
في نوع كمان تعتبر قوية وبتصير بتتحجج أنها بدها تستعمل الحمام .. مشان تتأكد من نظافة البيت .. طبعاً ذهابها للحمام يعني جولة بالبيت قدر المستطاع لا بد وأن تشمل المطبخ على الأقل .. وقد تتعمد أن تشم رائحة المطبخ لتخمن شو طابخين أهل العروس وهيك بيكون ضربت عصفورين بحجر واحد يلي هنن النظافة وإذا نفسهم طيب ع الطبخ ولا لأ .. وأكيد أكيد رح تعرف المستوى المادي لأهل العروس أو مدى كرمهم من إيدام الطبخة
وما بدي أحكي عن الخطابة الفظيعة التي تدعي أنها تريد أن تلقى نظرة من البلكون على سيارة ابنها يلي عم يستناها قدام بناية أهل العروس .. ظناً منها أنها قادرة بنظرة سريعة انها تستكشف إذا في شباب واقفين على البلاكين المقابلة وهذا طبعاً للتأكد من أخلاق البنت
وكمان ما بدي أحكي عن الخطابة يلي بتجي على بناية أهل العروس قبل الموعد بقليل متعمدة
وقال شو بتدق باب الجيران بغير طابق بالغلط .. وبطريقتها الزكية(متل عطشانة ولا قلب صار يحفق من طلعة الدرج) بتفوت على بيت الجيران قبل بيت العروس بتلملم شوية معلومات أكيد رح ينفعوها بالمهمة الشارلوكهولمزية التي تنتظرها

وفي الخطابة اللي مفكرة حالها جايبتلكن فرصة العمر اللي مابتتوقع أبدا إنكن تضيعوها من إيدكن لأنه معها فريد عصره وأوانه وجميل جمال بالكون كله ماإلو مثال واللي بياخدها بتكون إمها مرضية من الوالدين وشافت ليلة القدر ودعت لبنتها يرزقها ابن الحلال اللي يسعدها ويكون مالو مثال , ويا تعاسة البنت اللي ما بيختارها "سعيد النصبة " و بيكون مالها بالطيب نصيب .

ولا تنسو الشيفرة العجيبة تبع القهوة
يلي ما في بنت بالعالم ما بتعرفها .. وبيكون المحروس هو وامه مفكرين انو هدا لغز بينو وبينها مشان الام تعرف رأي ابنها بالعروس وما حدا يشتلأ عليهم
مشان هيك لكل المقبلين على الخطبة بدي قول: مشااااااااااااان الله اتفقوا مع أمهاتكم على شيفرة جديدة .. والله ملينا من سيناريو القهوة الحلوة بحال العروس حلوة ووسط ويا حرام أحياناً سادة ..

» أنواع الغرز في الكرشيه